Oportunidad ng trabaho sa ME lalo na sa Kuwait positibo -- labor exec

Tinatayang 12,000 trabaho ang maaring pasukan ng mga overseas Filipino workers (OFWs) sa Kuwait ngayong taon, ayon sa isang opisyal ng Department of Labor.

Sinabi nitong Martes ni Labor Attache Josephus Jimenez na nakabase sa Kuwait na malaki pa rin ang oportunidad sa Middle East ngayong 2009 lalo na sa Kuwait.

"Kuwait is not a credit economy, it is a cash economy, and it will continue to need people for jobs in hotels, malls, fast-food chains, and hospitals," pahayag ni Jimenez.

Malaki rin umano ang pangangailangan ng Kuwait para sa mga manggagawa sa industriya ng langis at construction business.

Hanggang ngayon ay wala pa umanong Pinoy sa Kuwait na nasibak sa trabaho dahil sa global financial crisis, ayon kay Jimenez.

Nagsisikap din umano ang pamahalaan na mabigyan ng magandang kontrata ang mga OFWs at mailayo ang mga Pinoy sa mga trabahong tinawag na "5 Ds -- dirty, difficult, dangerous, degrading, and deceptive."

Sa ngayon, tinatayang 140,000 ang OFWs sa Kuwait kung saan halos kalahati sa mga ito ay nagtatrabaho bilang household service workers.

Samantala, pinayuhan ni Labor Secretary Marianito Roque ang mga OFW na maging maingat sa kanilang desisyon na lumipat ng trabaho sa kabila ng pangambang krisis sa mundo.

“Unless you get an exciting offer, stick with the job you have right now," ayon sa kalihim.

Tumanggi si Roque na nagbigay ng bagong talaan ng posibleng trabaho sa ibang bansa na posibleng mawala dahil sa paghina ng ekonomya sa mga maraming bansa kabilang na ang Amerika.

50,000 OFWs mawawalan ng trabaho sa Taiwan, Dubai at SoKor

Inaasahang aabot sa limampung libong overseas Filipino workers (OFWs) ang mawawalan ng trabaho ngayong taon dahil sa paghagupit ng global economic crisis.

Ayon sa Department of Labor and Employment (DOLE), ang nasabing bilang ng mga OFWs na unang tatamaan ng global financial crisis ay mula sa mga bansang Taiwan, Dubai at South Korea.

Sa ngayon, tinata­yang nasa 5,000 OFWs na ang nawalan ng hanapbuhay sa Taiwan, Dubai at South Korea at inaasahan pa ang paglobo nito hanggang sa 50,000 sa taong ito, ayon kay DOLE Sec. Marianito Roque.

Gayunpaman, tini­yak ni Roque sa mga apektadong OFWs na makaka­hanap sila ng ibang ha­nap­buhay sa sandaling mag­balik sila sa Pilipinas habang ang iba naman ay maaaring magsanay upang umiba ng linya ng trabaho.

Iginiit pa ni Sec. Roque na tuluy-tuloy din ang gagawing deployment ng gobyerno ng mga manggagawang Pinoy sa kabila ng krisis.

Sinabi pa ng kalihim na araw-araw ay nakakapag-deploy ang gobyerno ng 3,000 manggagawa. Ang pag-akyat sa bilang ng deployment ay tumaas ng 24 porsiyento o katumbas ng 1.3 milyon noong nakaraang taon (2008).

Sa pagtataya, ang deployment mula Enero hanggang Oktubre ay uma­bot na sa 1.115 milyon o 25.5 porsiyento, mas mataas sa bilang ng mga umaalis na Pinoy sa kahalintulad na panahon noong 2007, ayon sa tala ng Philippine Overseas Employment Ad­mi­nistration (POEA).

Pinay Domestic Helper in Abu Dhabi

Umaabot sa 224 ang bilang ng mga kaso ng mga nag­layas na Filipino domestic helper (DH) sa Abu Dhabi pagtungtong ng kalagitnaang bahagi ng 2008 hanggang bago tuluyang magtapos ang kasalukuyang taon.

Karamihan sa mga naglayas na Pinay DH ay nakaranas ng hindi makataong pagtrato sa kanilang mga dayuhang employer at halos wala na umanong pahinga kung pagtrabahuhin sa banyagang lugar.

Ayon kay Nasser Munder, labor attaché ng Embahada ng Pilipinas sa Abu Dhabi, bukod sa nararanasang pagka-api ng mga Pinoy workers ay mayroon pa umanong mga pagkakataon na ayaw umanong ibigay ng mga employer ang kanilang mga travel documents.

Gayunpaman, sinabi ni Munder na mas madali naman ang pagpapauwi sa mga distressed workers na nagi­ging biktima ng panggagahasa at physical abuse.

“Rape, physical abuse and any criminal case against the employer even make it easier for us to repatriate these distressed workers because we just take the runaway maids for a medical examination and file the case in court,” ayon kay Munder.

Kagyat umanong ibinibigay ang pasaporte at pinag­ka­­kalooban din ng plane ticket pabalik ng Pilipinas ang Pinay DH kung may kinalaman sa ‘criminal act’ ng kanilang employer ang kanilang desisyon ng paglalayas.Sa kabila nito, marami pa rin umanong mga ‘runaway maid’ ang stranded sa Philippine Overseas Labor Office (POLO) dahilan sa pagtanggi ng mga employer na ikansela ang kanilang mga visa.