Deadline sa pag-apil sa Sinulog parade karong Miyerkules (Jan. 14, 2009)

KUTOB nalang karong Miyerkules ang gihatag nga deadline sa Sinulog Foundation Inc. alang sa mga mosalmot sa Sinulog grand parade nga makaparehistro.

Sa kasamtangan, dunay 87 ka mga partisipante ang nagparehistro alang sa nagkadaiyang kategoriya.

Moabot na sa 41 ka mga dancing contingent ang nakarehistro diin 26 niini alang sa Sinulog based samtang 15 sa free interpretation.

Sa maong gidaghanon, siyam niini ang mga out-of-town contingent diin upat kanila mga first-timer sa Sinulog.

Ang mga first-timer mao ang taga Placer, Masbate, Dulag sa Leyte , Tacloban, ug Gen. Luna sa Siargao Island, Surigao City.

Samtang ang ubang mga out-of-town mao ang Tangub, Abuyog, Leyte ; Sta. Catalina sa Negros Oriental, ug Lanao del Norte.

Ang napulo ka mga winners sa Sinulog sa Kabataan sa Lalawigan niadtong Sabado automatic na usab nga mosalmot sa grand parade.

Lima niini ang gikan sa elementary division nga mao ang Pajo sa Lapu-Lapu City; Kawayan sa Dalaguete; Pundok Tugbunganon sa Consolacion, Panagsogod sa Sogod ug Bogo City.

Samtang laing lima gikan sa secondary level mao ang Silaw sa Carcar City, Pundon Tayuranon sa Consolacion, Kaliwat Mandauehanon, Liloan ug Guinsay sa Danao City.

Ang laing napulo ka mga mananaog sa Sinulog sa Kabataan sa Dakbayan kagahapon automatic usab nga mosalmot sa grand parade.

Duna say 26 ka mga entry alang sa float category, ug tag napulo alang sa higante ug puppeteers.

Lima pa lang usab hinuon ang nagparehistro alang sa festival queen category o kadtong mga lead dancer.

Samtang moabot na sa kapin sa 600 ka mga photographers ang nagpa-rehistro aron mosalmot sa photo contest.

Ang maong gidaghanon nagsagol na sa mga professional o mga amateur.

Gitug-an ni Dolly Suzara, project director sa SFI, nga di na gyud nila lugwayan pa ang deadline maong gidasig ang mga partisipante nga magparehistro na.