Sinulog contingents naigo sab sa krisis

SUKWAHI sa nangaging mga tuig, hayan di makita ang mga bonggang costume gikan sa mga partisipante sa Sinulog grand mardi gras karon.

Gitug-an ni Dolly Suzara, project director sa Sinulog Foundation Inc, nga dunay mga contingent nga nag-budget gyud sa ilang costume tungod kay apektado usab sila sa nasinating krisis karon.

Apan gitataw ni Suzara nga ang theme ug interpretation ug di ang costume maoy labing importante kay bisan ang mga mananaog sa miaging tuig di kaayo bongga og mga costume apan midaog gihapon tungod sa maayong interpretation.

Nasayran nga ang matag contingent dunay di mominos sa 60 ka mga partisipante ug ang tanan nilang gastuhanan abagahon gyud sa ilang mga sponsor.

Hinuon magpabilin ang naandang premyo alang sa mga mananaog.

Bsan pa sa krisis, gipasalig ni Suzara nga bongga gyud ang kinatibuk-ang Sinulog festival kay dunay mga choreographer nga mangita gyud og mga pamaagi aron mogawas nga makalingaw ug mabulukon ang ilang presentation.

Wa pa hinuon matino sa Sinulog Foundation kon pila ang gidaghanon sa mga contingent karon sanglit sunod semana pa man ang gihatag nilang deadline.

Duna na hinuoy mga out-of-town contingent nga nagparehistro na nga naglakip sa mga first timer sama sa Placer, Masbate ug Dulag sa Leyte ug duna say gikan sa Mindanao.