HUMAN sa relihiyusong prosesyon kagahapon sa hapon diin sentro sa atong atensyon ang pagpangaliya kang Senyor Santo Niño, ipahigayon na karon ang tibuok adlaw nga Sinulog Grand Parade.
Kon buot hunahunaon, nagsentro gihapon kini sa pagdayeg sa Senyor.
Ang Sinulog mismo mao ang sayaw-pangaliya kang Senyor Santo Niño.
Hinuon, di na relihiyuso ang timpla sa adlaw kay panindotay sa sayaw ug costume ug pagwapahay sa lead dancer na man ang giapas karon.
Ang Sinulog Grand Parade lahi kaniadto dihang ang sayaw nga Sinulog anha lang buhaton palibot sa Basilica Minore del Santo Niño.
Ang Sinulog nahimo na karong pangdani sa turista ug mga balikbayan.
Tuyo niini mao ang dolyar nga ibubo sa atong mga bisita aron molambo pa ang lokal nga ekonomiya.
Sulod sa paglabay sa pipila ka dekada, institusyon na ang pagka komersyal sa Sinulog.
Bisan pa man, di nato kalimtang ipasabot sa atong mga bisita ug sa kabataan nga ang Sinulog di lang usa ka sayaw. Alang kini kang Senyor Santo Niño. Pit Senyor!
No comments:
Post a Comment