Sinulog 2009 Update

MGA tinun-an sa Pajo Elementary School sa dakbayan sa Lapu-Lapu ug sa Carcar Night School maoy nigawas nga mananaog sa Sinulog sa Kabataan sa Lalawigan.

Nidaog ang Pajo sa Kawayan ES sa lungsod sa Dalaguete pinaagi sa split decision ug milabaw lang og .5 nga puntos.

Sukwahi hinuon kini sa secondary level diin nigawas nga “runaway winner” ang Carcar.

Pareho nilang nakuha ang best in costume.

Pareho usab nga unang higayon, nakuha sa duha ka mga contingent ang unang ganti.

Nahimong third placer sa elementary ang Pundok Tugbunganon sa Consolacion, gisundan sa Panagsogod ES ug Bogo City.

Samtang ang Pundok Tayuranon sa Consolacion maoy 2nd placer sa secondary, gisundan sa Kaliwat Mandauehanon, Liloan ug Guinsay, sa Danao City.

Ang first prize winner makadawat og P40,000 samtang P30,000, P20,000, P15,000 ug P10,000 ang makuha sa ikaduha, ikatulo, ikaupat ug ikalimang puwesto.

Ang choreographer sa Pajo nga si March Mandal nga sud na sa unom ka tuig nga nagtudlo sa Sinulog sa maong mga tinun-an, nitug-an nga ang konsepto sa ilang sayaw iyang gikuha base sa Binuyogan Festival sa Leyte aron usab pag-recycle sa ilang mga props sa miaging tuig tungod kay naglisod sila sa ilang pundo.

Ang ilang principal nigasto na gani sa kaugalingong kuwarta sanglit niadto lang Biyernes na-release ang kuwarta sa city government.

Wa siya magdahom nga maoy modaog tungod kay niadto lang Disyembre 19 sila nagsugod og praktis apan niadto lang Enero 5 nahingpit ang 89 nila ka mga dancer.

Hinuon nahimo nang mananaog ang mga tinun-an sa nangaging mga tuig kay kaduha nila nasignit ang 2nd ug third place apan unang higayon kini karon nga na-first placer.

Unang higayon usab nga na-first place ang Carcar. Nahimo silang 4th sa miaging tuig ug 5th place sa Sinulog based category atol sa Sinulog grand mardi gras.

Matod sa choreographer nga si Catherine Estenzo nga usa ka buwan lang gyud ang ilang preparation sa sayaw nga dunay Spanish-era nga theme ug may konsepto sa “art of giving.”

Gani tungod sa praktis wa gyud siya makapahimus sa iyang Christmas vacation kay matag adlaw ang ilang gihimong praktis.

Sukwahi sa Pajo, nakadawat hinuon og maayong financial support ang Carcar kay nahatagan sila og P100,000 ni Gov. Gwen Garcia ug ang katunga niini ilang gigasto sa ilang costume nga gi-design ni Val Sandiego.

Matod sa chairman sa mga hurado, Josefina Guilen, nga unanimous gyud ang pagkadaog sa Carcar. Iyang gitug-an nga na-perfect gyud sa Carcar ang tanang criteria gikan sa ilang performance, choreography, sequence, ug musicality.

Gidayeg usab niya ang grupo tungod sa maayong highlight ug build-up sa ilang sayaw ug ang classy costume.

“We hope, they fair well in the grand parade,” nagkanayon si Guillen.

Sa kinatibuk-an dunay 18 ka mga contingent sa Kabataan sa Lalawigan, diin tag 9 gikan sa elementary ug secondary.