Mga sindikato nangabot, mopahimulos sa Sinulog

HUMAN sa kapistahan sa Black Nazarene sa kaulohan, gipaabot nga karong semanaha hinayhinay na nga mangabot dinhi sa dakbayan ang nagkadaiyang sindikato sa mga kawatan ug mangunguot alang sa Sinulog.

Subay niini, gihingusgan na usab sa kapulisan ang ilang pagbantay batok sa maong mga grupo pinaagi sa pagpahugot sa ilang monitoring ug pakig-alayon sa management sa mga pension house ug mga guwardya sa mga mall ug kan-anan.

Gitug-an ni S/Insp. Michael Anthony Bastes, hepe sa Theft and Robbery Section (TRS) sa Cebu City Police Office (CCPO) nga ilang gipaabot nga maghinayhinay nag pangabot dinhi ang mga kawatan nga gikang namiktima atol sa kapistahan sa Black Nazarene didto sa kaulohan.

“Kadtong atong nadakpan sa unang mga tuig gikan to sila sa Black Nazarene kay inig human didto, anhi man dayon dire,” niingon si Bastes.

Hinuon, niingon si Bastes nga gawas sa mga notadong mga personalidad nga ila nang nailhan human usab mangasikop, maglisod gyud sila og identify sa ubang mga kawatan.

Ang pagpaniid nalang sa mga lihok maoy bugtong paagi sa kapulisan sa pag-identify kanila.

“Mailhan mana nimo sila pinaagi sa ilang lihok kay kon ang uban magtutuok gyud og tan-aw sa Sinulog, kana sila magsige og lakaw-lakaw, magbahas-bahas kay mangita og biktimahon,” pagtug-an pa ni Bastes.

Sanglit di man tanang mga kawatan o mangunguot ang mabantayan sa kapulisan, matod ni Bastes nga nakig-alayaon na sila sa mga guwardiya sa mga mall ilabina na sa mga kan-anan.

Duha ka dagkong fastfood chains nga base sa nangaging tuig maoy sagad gisudlan sa mga kawatan ang giadto na ni Bastes aron pahimangnoan ang mga guwardiya.

Matod ni Bastes nga iyang gitudloan ang mga guwardya unsaon pagbantay sa mga kawatan.

“Kanang mga tawo nga inig sud di mo-order, maglingkodlingkod lang unya magbalhinbalhin og lingkuranan,” dugang tug-an ni Bastes.

Samtang ila usab nga giadto ang ubang mga pension house ug gipasidan-an sa pagtawag dayon sa kapulisan kon dunay mamatikdang mga tawo nga kadudahan og mga lihok.

Matod ni Bastes nga sagad usa ra ka tawo ang mo-check-in kay kadaghanan kanila way mga identification card.

Sagad sa mga sindikato gikan sa Ormoc, Metro Manila ug Mindanao.