Ning halandumong adlaw sa Imong kapistahan, Oh, Senyor Santo Niño nga Labing Balaan, Ang tanan namong giandam nga mga kalihukan Hinaot unta nga imong panalanginan!
Sukad pa sa among mga katigulangan Ikaw among gisimba ug gipakabalaan.
Ang pagtuman sa Imong mga sugo gipaningkamutan Pinaagi sa pagpuyong malinawon ning kalibutan.
Ug mao gayuy bugtong nga hinungdan Nga Ikaw kanunay among dayegon ug pasalamatan, Kay ang mga grasya nga among nadawat nga tanan Gikan man Kanimo kay Ikaw man ang tuboran.
Mosayaw ug mag-ampo kami sa Imong atubangan Among kinasingkasing halad aron Imong kahimut-an.
Sa Imong mga panalangin Imo unta kaming hatagan Sa among panginahanglan dinhi niining kalibutan.
Buhi Ikaw sa tanan nga kapanahunan Kay diha Ka na sa wala pa ang kalibutan.
Nagpakatawo aron pagtubos sa among kasal-anan Aron kami angayng tawgon mga anak sa Diyos sa Kahitas-an.
Pinaagi Kanimo sa Langitnong Amahan kami nakaila Kay Imong gimantala ang Iyang Pagka-Siya;
Nga ang tanang nakaila Kanimo nakaila usab Kaniya, Kay Diyos Amahan, Diyos Anak, Diyos Espirito Santo usa ra!
Subscribe to:
Post Comments (Atom)
No comments:
Post a Comment